იტალიის “მილანის” ხელმძღვანელობის მიერ, მთავარ მწვრთნელ კარლო ანჩელოტისადმი წაყენებული ულტიმატუმის თანახმად, 49 წლის სპეციალისტი თანამდებობას მხოლოდ გუნდის სამეულში მოხვედრისა და ჩემპიონთა ლიგის საგზურის მოპოვების შემთხვევაში შეინაჩრუნებს.
ამის შესახებ სააგენტო AP იუწყება.
ბოლო პერიოდში, “მილანი” წარუმატებლად ასპარეზობს - ჯერ “ინტერთან” დერბიში 1:2 დამარცხდა, შემდეგ უეფას თასს ბრემენის “ვერდერთან” დაპირისპირებაში გამოეთიშა, ხოლო გასულ უქმეებზე სერია A-ში “სამპდორიასთან” 1:2 წააგო.
დღესდღეობით, “მილანს” სატურნირო ცხრილში მე-3 ადგილი უკავია და ლიდერ “ინტერს” 12 ქულით ჩამორჩება, ხოლო მეორეადგილოსან “იუვენტუსს” - 5-ით.
“კარლო ანჩელოტი იმ შემთხვევაში დარჩება, თუ სამეულში მოვხდებით” – განაცხადა “მილანის” ვიცე-პრეზიდენტმა ადრიანო გალიანიმ Gazzetta dello Sport-თან საუბარში.
მომავალი სეზონიდან, ჩემპიონთა ლიგის საგზურს სერია A-ში პირველ სამ ადგილზე გასული გუნდი პირდაპირ მოიპოვებს, ხოლო მეოთხეადგილოსანი საკვალიფიკაციო ტურნირში ითამაშებს.